ජනාධිපතිවරයන්ගේ හිමිකම් පිළිබඳ නව පනත් කෙටුම්පත පාර්ලිමේන්තුවේ තවම සම්මත වී නැත!

හිටපු ජනාධිපතිවරයන්ගේ හිමිකම් සහ වරප්‍රසාද ඉවත් කිරීම සඳහා ගොනු කරන ලද නව පනත් කෙටුම්පතක් පසුගිය ජූලි 31 වන දින ගැසට් පත්‍රයක් හරහා නිකුත් කරන ලදී. දැනට කැබිනට් එක හරහා මෙම නව පනත් කෙටුම්පතට අනුමැතිය ලැබී ඇත. මෙම පනත් කෙටුම්පත ගැන විවිධ අදහස් මේ වනවිට ප්‍රධාන ධාරාවේ සහ සමාජ මාධ්‍යවල පැතිරෙමින් ඇත.

TikTok හි @raveesoba නමැති ගිණුමක් HiruTV ‘පත්තරේ විස්තරේ’ මෙම නව පනත් කෙටුම්පත ගැන කියන වීඩියෝවක් සමග මෙසේ පවසයි: “හිටපු ජනාධිපතිවරු ගෙදර. පනත සම්මතයි. කිව්ව දේ කරන හැඩයි.”

මෙම පනත් කෙටුම්පත ගැන මෙසේ පැතිර යන තොරතුරේ සත්‍ය අසත්‍ය බව පරීක්ෂා කිරීමට Newschecker අපි තීරණය කළෙමු.

මෙම නව පනත් කෙටුම්පත කුමක්ද? 

දැනට ක්‍රියාත්මක 1986 නො. 4 පනත අනුව හිටපු ජනාධිපතිවරයකුට විශ්‍රාම වැටුපක්, නිල නිවෙසක්, කාර්යාලයක්, කාර්ය මණ්ඩලයක්, ලේකම්වරයෙක්, ආරක්ෂක පිරිස සහ නිල රථ යනුවෙන් වරප්‍රසාද කිහිපයක් හිමිවෙයි. එය රජයේ ඒකාබද්ධ අරමුදලෙන් ගෙවිය යුතු බවත් පාර්ලිමේන්තුව විසින් යෝජනා සම්මතයෙන් වැඩි කළ හැකි වුවද එම වැටුප් දීමනා සහ විශ්‍රාම වැටුප් හිමිකම් අඩු කළ නොහැකි බවද එම වගන්තිවල සඳහන්ය.‍ 2024 ඔක්තෝම්බර් මස NPP රජය බලයට පත්වීමෙන් පසු විශේෂ ත්‍රිපුද්ගල කමිටුවක් හිටපු ජනාධිපතිවරුන් වන චන්ද්‍රිකා කුමාරතුංග, මහින්ද රාජපක්ෂ, මෛත්‍රීපාල සිරිසේන, ගෝඨාභය රාජපක්ෂ, සහ රණසිංහ ප්‍රේමදාසගේ බිරිඳ හේමා ප්‍රේමදාස නඩත්තුව සඳහා 2022 වසරේ සිට 2024 වසර දක්වා පමණක් වැය කර ඇති මුදල රුපියල් කෝටි 27 කට ආසන්න බව සොයාගත්හ. මේ ගැන තවත් විස්තර මෙතනින් සහ මෙතනින්.

ඉහත දක්වා ඇති පරිදි හිටපු ජනාධිපතිවරයන් සඳහා විශාල වියදමක් දැරීමට සිදු වන නිසා, NPP ආණ්ඩුව ජූලි මාසයේ නව පනත් කෙටුම්පතක් කැබිනට් එක සමඟ සාකච්ඡා කළහ. ජූලි 31 වන දින ගැසට් කරන ලද මෙම පනත් කෙටුම්පතට අනුව, හිටපු ජනාධිපතිවරයෙකුට හෝ වැන්දඹුවකට සපයන ලද යම් නිවසක් හෝ ගෙවන ලද මාසික දීමනාව, හිටපු ජනාධිපතිවරයෙකුට හෝ හිටපු ජනාධිපතිවරයෙකුගේ වැන්දඹුවකට ගෙවන ලද මාසික ලේකම් දීමනාව, ප්‍රවාහන සහ වෙනත් පහසුකම්, සහ හිටපු ජනාධිපතිවරයෙකුගේ වැන්දඹුවකට ගෙවන ලද මාසික විශ්‍රාම වැටුප යනාදිය ඉවත් කිරීමට නියමිතයි.

Fact Check/Verification

මෙම පනත් කෙටුම්පත සම්පුර්ණයෙන්ම පාර්ලිමේන්තුව හැර සම්මත වී ඇත්ද යන්න සොයා බැලීමට අපි “පනත් කෙටුම්පත”, “ජනාධිපති හිමිකම්”, “පාර්ලිමේතුව”, සහ “නලින්ද ජයතිස්ස” යන වචන යොදා ගනිමින් මූල පද සෙවීමක් කළෙමු.

අපට දැනගන්නට ලැබුණේ පසුගිය ජූලි 31 දා පැවති කැබිනට් හමුවේදී අමාත්‍ය නලින්ද ජයතිස්ස මෙම පනත් කෙටුම්පත පාර්ලිමේන්තුවට ඉදිරිපත් කරන බව පැවසූ නමුත් මෙතෙක් කෙටුම්පත පාර්ලිමේතුවේ සාකච්ඡා කිරීමට දිනයක් නියම කර නොමැති බවයි. ලංකාවේ නීතියට අනුව කැබිනට් අනුමැතිය ලැබුණද, පාර්ලිමේන්තු සම්මතය නොමැතිව පනත් කෙටුම්පතක් නීතිමය පනතක් විය නොහැක.

පාර්ලිමේන්තුවේ ක්‍රියාපටිපාටියට අනුව, සාමාන්‍ය පනත් කෙටුම්පත්, “යම් අමාත්‍යවරයෙකුගේ ඉල්ලීම පරිදි ආණ්ඩුක්‍රම ව්‍යවස්ථාවේ 78 වන ව්‍යවස්ථාව ප්‍රකාර ගැසට් පත්‍රයේ පළ කිරීමෙන් දින 7 කට පසුව…න්‍යාය පත්‍රයට ඇතුළත් කර 50(1) ස්ථාවර නියෝගය ප්‍රකාරව පළමුවැනි වර කියවීම සිදු කෙරේ.” මේ අනුව, ජූලි 31 ගැසට් වූ මෙම පනත් කෙටුම්පත මුලින්ම පාර්ලිමේන්තුවේ කියවිය හැක්කේ අගෝස්තු 7 වන දින ය.

පළමුවර කියවීමෙන් දින 14 ක් ඉක්මවීමෙන් පසුව ස්ථාවර නියෝග 50(1) සහ 55(1) ප්‍රකාරව පනත් කෙටුම්පත දෙවැනි වර කියවීම සඳහා නියමු කරනු ලැබේ. පනත් කෙටුම්පත දෙවැනි වර කියවීමේ දිනය පාර්ලිමේන්තු කටයුතු පිළිබඳ කාරක සභාව විසින් තීරණය කළ යුතුය. මේ අනුව, පාර්ලිමේන්තුවේ දෙවන වර කියවා පනත් කෙටුම්පත සම්මත වීම/නොවීම තීරණය වනු ඇත්තේ අගෝස්තු 21 දිනට පසුව බව පැහැදිලිය. මීට අමතරව පාර්ලිමේන්තුවේ සිදුවිය හැකි ප්‍රමාද නිසා ද මේ තීරණය කල් යා හැක.

Conclusion

ජනාධිපතිවරයන්ගේ හිමිකම් පිළිබඳ 1986 අංක 4 දරන පනත ඉවත් කිරීමට නව පනත් කෙටුම්පත ජූලි 31 වන දින ගැසට් පත්‍රයක් හරහා නිකුත් කරන ලද නමුත් මෙතෙක් පාර්ලිමේන්තුවේ එය සම්මත කිරීම සඳහා විවාදය සඳහා දිනයක් නියම කර නොමැත.

අපේ මූලාශ්‍ර

‘හිටපු ජනපති වරප්‍රසාද කප්පාදුව’, ලංකාදීප පුවත්පත, 2025 පෙබරවාරි 25
ශ්‍රී ලංකා ප්‍රජාතාන්ත්‍රික සමාජවාදී ජනරජයේ ගැසට් පත්‍රය, 2025 ජූලි 25, II කොටස, අතිරේකය, 2025 ජූලි 31
‘විශ්‍රාමික ජනපතිවරුන්ගේ වරප්‍රසාද කප්පාදු කෙරෙන නව කෙටුම් පත ගැසට් කෙරේ; අහිමිවන වරප්‍රසාද මොනවා ද?’, BBC සිංහල, 2025 ජූලි 31
රජයේ පනත් ‌කෙටුම්පත් | පාර්ලි‌මේන්තු‌වේ කටයුතු සිදුවන ආකාරය, parliament.lk, 2025 අගෝස්තු 4