இலங்கையில் புற்றுநோயைக் குணப்படுத்தும் மருந்து கண்டுபிடிக்கப்பட்டுள்ளதா?

“இலங்கையில் புற்றுநோய் செல்களைக் கொல்லும் மருந்து கண்டுபிடிப்பு” மற்றும் “இலங்கையில் புற்று நோய் மருந்து கண்டுபிடிப்பு!” போன்ற தலைப்புகளுடன், புற்று நோயைக் குணப்படுத்தும் மருந்தை இலங்கை கண்டுபிடித்துள்ளதாக சமூக ஊடகங்களில் பல பதிவுகள் வைரலாக பரப்பப்படுகின்றன.

அவ்வாறு பகிரப்பட்ட TikTok பதிவொன்றில், “புற்றுநோய்க்கு எதிரான புதிய மருந்து இலங்கையில் கண்டுபிடிப்பு….. கொழும்பு பல்கலையின் புதிய மைல்கல்” என குறிப்பிடப்பட்டிருந்தது. கொழும்பு பல்கலைக்கழகத்தின் உயிர்வேதியியல், மூலக்கூறு உயிரியல் மற்றும் உயிரி தொழில்நுட்ப நிறுவனத்தின் (IBMBB) பேராசிரியர் சமீர ஆர். சமரகோன் தலைமையிலான ஆராய்ச்சிக் குழு 17 வருட ஆராய்ச்சிக்குப் பிறகு இந்த மருந்தைக் கண்டுபிடித்ததாக இந்த காணொளியில் குறிப்பிடப்பட்டிருந்தது.

இதே போன்ற பதிவுகள் Facebook, TikTok மற்றும் YouTube தளங்களிலும் பகிரப்பட்டுள்ளன. இந்தப் பதிவுகளை இங்கே, இங்கே, இங்கே, இங்கே, இங்கே, இங்கே, இங்கே, இங்கே, இங்கே, மற்றும் இங்கே காணலாம்.

Evidence

• “புற்றுநோய் செல்களை அழிக்கக் கூடிய, உள்நாட்டில் உருவாக்கப்பட்ட  ஊட்டச்சத்து மருந்து 2027 ஆம் ஆண்டுக்குள் ஏற்றுமதியில் சுமார் 2 மில்லியன் அமெரிக்க டாலர்களை ஈட்டும் என்று எதிர்பார்க்கப்படுகிறது” என்ற பேராசிரியர் சமீர ஆர். சமரக்கோனின் கூற்றை மேற்கோள் காட்டி வீரகேசரி, அத தெரண தமிழ் மற்றும் ஹிரு நியூஸ் ஆகிய தளங்கள் சமீபத்தில் செய்தி வெளியிட்டிருந்தன. இந்த செய்தி அறிக்கைகள் இதனை ஒரு மருந்தாக விபரிக்கவில்லை, மாறாக ஒரு ஊட்டச்சத்து மருந்து அல்லது துணைப் பொருளாக மட்டுமே அறிக்கையிட்டிருந்தன.

• பேராசிரியர் சமரகோன் 2025.10.06 அன்று Daily Mirror பத்திரிகைக்கு வழங்கிய நேர்காணலில் இந்த தயாரிப்பு புதியதல்ல என்றும், இது மூன்று ஆண்டுகளுக்கு முன்பு அறிமுகப்படுத்தப்பட்டது, மேலும் புதிய ஆராய்ச்சி முடிவுகள் அதன் மீது ஊடகங்களின் கவனத்தை ஈர்த்தன எனவும் குறிப்பிட்டார். மேலும், “இது ஒரு புற்றுநோயை குணப்படுத்தக்கூடிய மருந்து அல்ல, ஆனால் நோயாளர்கள் சிறந்த வாழ்க்கையை வாழ உதவும் வகையில் உருவாக்கப்பட்ட ஒரு ஊட்டச்சத்து மருந்து” எனவும் அவர் தெளிவுபடுத்தினார்.

• “Royalty Transfer with regards to the Partnership between Fadna Life Science & the University of Colombo” என்ற தலைப்பில் 27.09.2023 திகதி கொழும்பு பல்கலைக்கழகத்தின் வலைத்தளத்தில் வெளியிடப்பட்டிருந்த கட்டுரையில், Vernolac, Satiny, Ortho Shield, மற்றும் Bio Shape ஆகியவை Fadna Life Science உடனான உரிம ஒப்பந்தத்தின் கீழ் 23.08.2022 அன்று அறிமுகப்படுத்தப்பட்டன என்பதை உறுதிப்படுத்துகிறது. அந்தக் கட்டுரையில் Vernolac புற்றுநோய் செல்களை அழிப்பதற்கும் வாழ்க்கைத் தரத்தை மேம்படுத்துவதற்கும் உருவாக்கப்பட்ட ஒரு ஊட்டச்சத்து மருந்து என்று விபரிக்கப்படுகிறது.

• Vernolac என்ற தயாரிப்பு தற்போது Fadna Tea Pvt. Ltd நிறுவனத்தால் விற்கப்படுகிறது. இது ஒரு மருந்தாகவோ அல்லது சிகிச்சைப் பொருளாகவோ அன்றி, புற்றுநோய் சிகிச்சையை ஆதரிக்கும் ஒரு மூலிகை ஊட்டச்சத்துப்பொருளாகவே சந்தைப்படுத்தப்படுகிறது.

• கொழும்பு பல்கலைக்கழகம், அதன் வலைத்தளம் மற்றும் பேஸ்புக் பக்கத்தில் “பல்கலைக்கழகத்தின் ஆராய்ச்சி மற்றும் மேம்பாட்டு நடவடிக்கைகள் பற்றிய தவறான சமூக ஊடக பதிவுகள்” என்ற தலைப்பில் ஒரு அதிகாரப்பூர்வ மறுப்பு அறிக்கையை வெளியிட்டுள்ளது. தவறான சமூக ஊடக பதிவுகள் மற்றும் பல்கலைக்கழகத்தின் பெயர் அல்லது இலச்சினையை அங்கீகரிக்கப்படாத முறையில் பயன்படுத்துவதற்கு எதிரான ஒரு எச்சரிக்கையையம் இப்பதிவு கொண்டுள்ளது.

• பேராசிரியர் சமரக்கோன் தனது அதிகாரப்பூர்வ முகநூல் பக்கத்தில், ஆராய்ச்சி முடிவுகள் முன் மருத்துவ சரிபார்ப்புகளுக்கு உட்பட்டுள்ளன எனவும் என்றும், நோயாளர்கள் தகுதிவாய்ந்த மருத்துவ ஆலோசனையைப் பின்பற்ற வேண்டும் என்றும் தெளிவுபடுத்தினார். நிலையான மருத்துவ சிகிச்சைகளை கைவிடுவதை தானோ அல்லது பல்கலைக்கழகமோ ஆதரிக்கவில்லை என்றும் அவர் கூறினார்.

• இதேவேளை, அறிவியல் ரீதியாக நிரூபிக்கப்பட்ட மற்றும் அங்கீகரிக்கப்பட்ட புற்றுநோய் சிகிச்சை மருந்துகள் மூலமே புற்றுநோயை முற்றிலும் குணப்படுத்த அல்லது கட்டுப்படுத்த முடியும் என்பதை இலங்கை புற்றுநோய் மருத்துவ நிபுணர்கள் சங்கமும் ஒரு முகநூல் பதிவின் மூலம் பொதுமக்களுக்கு நினைவூட்டியது.

Context

அண்மையில் பேராசிரியர் சமீர ஆர். சமரகோன், Vernolac தொடர்பான தொடர்ச்சியான நான்கு ஆய்வுகளில் இரண்டு ஆய்வுகள் சமீபத்தில் வெளியிட்டதாகவும், புற்றுநோய் செல்களை இலக்காகக் கொண்டு உள்நாட்டில் உருவாக்கப்பட்ட ஊட்டச்சத்து மருந்து 2027 ஆம் ஆண்டுக்குள் சுமார் இரண்டு மில்லியன் அமெரிக்க டொலர்களை ஏற்றுமதி வருவாயாக ஈட்டக்கூடும் என்றும் குறிப்பிட்டிருந்ததைத் தொடர்ந்து கொழும்பு பல்கலைக்கழகத்தின் ஆராய்ச்சி குறித்த ஊடகங்களின் கவனம் மீண்டும் அதிகரித்தது. பிராதன ஊடகங்களில் வெளிவந்த செய்திகள், பொதுமக்களின் தவறான புரிதலினால் புற்றுநோய்க்கான மருந்தை இலங்கை கண்டுபிடித்திருப்பதாக அவை சமூக ஊடகங்களில் பரவத்தொடங்கியது.

Verdict

இலங்கை புற்றுநோயைக் குணப்படுத்த ஒரு மருந்தைக் கண்டுபிடித்ததாக பரவும் கூற்று தவறானது. கொழும்பு பல்கலைக்கழகம் 2022 ஆம் ஆண்டில் புற்றுநோய் செல்களை அழிக்கும் ஊட்டச்சத்து தயாரிப்பை உருவாக்கியது. எனினும் அது புற்றுநோய்க்கான  சிகிச்சையாக நிரூபிக்கப்படவில்லை அல்லது அங்கீகரிக்கப்படவில்லை. பல்கலைக்கழகமும் இதனுடன் தொடர்புடைய மருத்துவ அதிகாரிகளும் சமூக ஊடகங்களில் பரவி வரும் இந்த தவறான கூற்றுகளை பகிரங்கமாக மறுத்து தெளிவுபடுத்தியுள்ளனர்.

FAQs

Q1. கொழும்பு பல்கலைக்கழகம் புற்றுநோயைக் குணப்படுத்த ஒரு மருந்தைக் கண்டுபிடித்ததா?
இல்லை. இந்த தயாரிப்பு ஒரு ஊட்டச்சத்து பொருளாகும். இது புற்றுநோய்க்கு சிகிச்சையளிக்கக்கூடிய அல்லது குணப்படுத்தக்கூடிய ஒரு மருந்து அல்ல.

Q2. Vernolac என்றால் என்ன?
Vernolac என்பது புற்றுநோய் சிகிச்சையை ஆதரிப்பதற்கும் நோயாளர்களின் வாழ்க்கைத் தரத்தை மேம்படுத்துவதற்கும் உருவாக்கப்பட்ட ஒரு மூலிகை அடிப்படையிலான ஊட்டச்சத்து மருந்து ஆகும். இது புற்றுநோயைக் குணப்படுத்தாது.

Q3. இந்த தயாரிப்பு தொடர்பில் பேராசிரியர் சமீர ஆர். சமரகோனின் கருத்து என்ன?
இது ஒரு மருந்து அல்ல என்றும், ஆராய்ச்சி இன்னும் நடந்து கொண்டிருக்கிறது என்றும் அவர் தெளிவுபடுத்தினார். சிகிச்சைகளுக்கு தகுதிவாய்ந்த மருத்துவர்களிடமிருந்து மருத்துவ ஆலோசனையைப் பெறுமாறு அவர் பொதுமக்களை வலியுறுத்தினார்.

Q4. வைரலாகப் பரவி வரும் இந்த கூற்றுக்கள் குறித்து கொழும்பு பல்கலைக்கழகத்தின் நிலைப்பாடு என்ன?
பல்கலைக்கழகம் இந்தக் கூற்றுக்களை மறுத்து ஒரு பொது அறிவிப்பை வெளியிட்டது, மேலும் அதன் பெயர் மற்றும் இலச்சினையை அங்கீகரிக்கப்படாத முறையில் பயன்படுத்துவதற்கு எதிராகவும் எச்சரித்துள்ளது.

எமது மூலங்கள்
03.10.2025 அன்று டெய்லி மிரர் யூடியூப் அலைவரிசையில் வெளியான பேராசிரியர் சமீர ஆர். சமரக்கோனின் நேர்காணல்.
06.10.2025 அன்று வீரகேசரி வலைத்தளத்தில் வெளியான செய்தியறிக்கை.
03.10.2025 அன்று அத தெரண வலைத்தளத்தில் வெளியான செய்தியறிக்கை.
03.10.2025 அன்று ஹிரு நியூஸ் வலைத்தளத்தில் வெளியான செய்தியறிக்கை.
06.10.2025 அன்று டெய்லி மிரர் வலைத்தளத்தில் வெளியான செய்தியறிக்கை.
27.10.2023 அன்று கொழும்பு பல்கலைக்கழக வலைத்தளத்தில் வெளியான அறிக்கை.
Fadna Tea Pvt. Ltd இணையதளத்தில் Vernolac தயாரிப்பிற்கு வழங்கப்பட்டுள்ள விளக்கம்.
05.10.2025 அன்று கொழும்பு பல்கலைக்கழக அதிகாரப்பூர்வ பேஸ்புக் பக்கத்தில் வெளியான பதிவு.
10.10.2025 அன்று கொழும்பு பல்கலைக்கழக வலைத்தளத்தில் வெளியிடப்பட்ட மறுப்பு அறிக்கை.
09.10.2025 அன்று கொழும்பு பல்கலைக்கழக அதிகாரப்பூர்வ பேஸ்புக் பக்கத்தில் வெளியான பதிவு.
08.10.2025 அன்று பேராசிரியர் சமரக்கோனின் பேஸ்புக்கில் வெளியிடப்பட்ட பதிவு.
06.10.2025 அன்று இலங்கை புற்றுநோய் மருத்துவர் சங்கம் வெளியிட்ட பேஸ்புக் பதிவு.
19.07.2025 அன்று வெளியிடப்பட்ட Vernolac பற்றிய ஆய்வறிக்கை.