ජනපති AKD ප්‍රමුඛ NPP ආණ්ඩුව ඉල්ලා අස් විය යුතු බව කාදිනල් මැල්කම් රංජිත් පැවසුවාද?

කොළඹ අගරදගුරු කාදිනල් මැල්කම් රංජිත් හිමිගේ ඡායාරුපයක් සමඟ “ඉල්ලා අස්වෙන්න, කාදිනල් හිමි ජනපතිගෙන් සහ ආණ්ඩුවෙන් ඉල්ලයි” යනුවෙන් පවසන අද දෙරණ සිංහල ලාංඡනය සහිත සටහනක් මේ දිනවල TikTok හරහා වයිරල් වෙමින් පවතී. 

මෙම සටහන Facebook සහ Threads හරහා ද සංසරණය වෙමින් පවතී.

මෙම සටහන නොමඟ යවන සුළු බව Newschecker අපට අනාවරණය විය.

Evidence

1. මේ වයිරල් සටහනේ දැක්වෙන පරිදි අනුර කුමාර දිසානායක ප්‍රමුඛ NPP රජය ඉල්ලා අස්විය යුතු බව කාදිනල් තුමා මෑතකදී කියන කිසි ප්‍රවෘත්තියක් අපට සොයාගත නොහැකි විය. එහෙත්, අපට කාදිනල් තුමා මේ සමාන ප්‍රකාශයක් කළ අවස්ථාවක් හමු විය. 2022 ජූලි කාදිනල් තුමා මාධ්‍ය සාඛච්ඡාවකදී එවක රාජපක්ෂ ආණ්ඩුවට සහ ජනපති ගෝටාභය රාජපක්ෂට ඉල්ලා අස්වෙන ලෙස කියා සිටියේය. එම අවස්ථාවේ දර්ශන මෙම Daily Mirror Online Youtube චැනල් එකේ දැකගත හැක.

2. ලංකාවේ වෙනත් විශ්වාසවන්ත මාධ්‍ය ජාලාවලද මේ පිළිබඳව වාර්තා විය.

3. ජාත්‍යන්තරයේ ක්‍රිස්තියානි ආගමට අදාළ ප්‍රවෘත්ති වාර්තා කරන Vatican News මාධ්‍ය ජාලය ද කාදිනල් තුමා 2022 දී රාජපක්ෂ ආණ්ඩුව ගැන සිදු කළ මෙම ප්‍රකාශය පළ කළහ.

Context

2025 ඔක්තෝම්බර් මාසයේ අනුර කුමාර දිසානායක ජනපති යටතේ ඇති NPP ආණ්ඩුව එක වසරක් සම්පූර්ණ කිරීමත් සමඟ මේ දිනවල බොහෝ දෙනා ඔවුන්ගේ ක්‍රියා පටිපාටි පිළිබඳව සමාජ මාධ්‍යවල අදහස් බෙදා ගනිමින් සිටිති. මේ කාලයේ ලංකාවේ කතෝලික අගරදගුරු මැල්කම් රංජිත් හිමි මෙම ආණ්ඩුව ගැන සිතන දේ ගැන බොහෝ දෙනා විවිධ දේ වාර්තා කර ඇත. මේ නිසා සමාජ මාධ්‍යවල වැරදි තොරතුරු පළ වීමට ඇති සම්භාවිතාව වැඩිය.

Verdict

අද දෙරණ සිංහල ලාංඡනය සහිත කොළඹ අගරදගුරු කාදිනල් මැල්කම් රංජිත් හිමිගේ ඡායාරුපයක් සමඟ “ඉල්ලා අස්වෙන්න, කාදිනල් හිමි ජනපතිගෙන් සහ ආණ්ඩුවෙන් ඉල්ලයි” යනුවෙන් පවසන සටහන නොමඟ යවන සුළුය. 2022 ජූලි 5 වන දින පැවති මාධ්‍ය හමුවකදී අදහස් දක්වමින්, 2022 පැවැති දුෂ්කර ආර්ථීක සහ අරගල තත්ත්වය පිළිබඳ වගකීම භාරගෙන ජනාධිපති ගෝඨාභය රාජපක්ෂ මහතා ඇතුළු රජය ඉවත් වන ලෙස කාදිනල් මැල්කම් රංජිත් හිමිපාණන් ඉල්ලා සිටියේ ය. මෙම සටහන ඒ දිනවල පළවූ එකක් වන අතර වර්තමාන (2025) රජය ගැන කාදිනල් තුමා කරන ලද ප්‍රකාශයක් නොවේ.

FAQs

Q1. කාදිනල් තුමාගේ මෙම වයිරල් ප්‍රකාශය කවුරු පිළිබඳව කරන එකක් ද?
කාදිනල් හිමි මෙම ප්‍රකාශය කරන ලද්දේ 2022 රාජපක්ෂ ආණ්ඩුව පිළිබඳව ය.

Q2. ජනපති අනුර කුමාර දිසානායක සහ NPP ආණ්ඩුවට ඉල්ලා අස්වෙන ලෙස කාදිනල් මැල්කම් රංජිත් හිමි පැවසුවා ද?
නැත.

Q3. කාදිනල් තුමාගේ මෙම වයිරල් ප්‍රකාශය ඔහු කවදා කරන ලද එකක් ද?
කාදිනල් තුමා මේ ප්‍රකාශය 2022 දී කළේ ය.

Our Sources

Daily Mirror Online නිල YouTube වීඩියෝව, 2022 ජූලි 22
‘Cardinal calls President and the govt to step down’, Sunday Times Online ප්‍රවෘත්ති වාර්තාව, 2022 ජූලි 5
‘Cardinal Ranjith reiterates call for Sri Lankan president’s resignation’, Vatican News ප්‍රවෘත්ති වාර්තාව, 2022 ජූලි 7