Newchecker.in is an independent fact-checking initiative of NC Media Networks Pvt. Ltd. We welcome our readers to send us claims to fact check. If you believe a story or statement deserves a fact check, or an error has been made with a published fact check
Contact Us: [email protected]
Fact Check
වාර්තාව: මෙම වසරේ අ.පො.ස. සාමාන්‍ය පෙළ (G.C.E. O/L) විද්‍යා විභාග ප්‍රශ්න පත්‍රය වෙන වසරවලට වෙනස් ලෙස ව්‍යුහගත කර leak වී ඇති නිසා, සියලුම අපේක්ෂකයින්ට අමතර සහන ලකුණු 8ක් ප්‍රදානය කරනු ලබන අතර, ශ්‍රේණිගත කිරීමේ සීමාවන් ලකුණු 10කින් අඩු කරනු ලැබේ.
කරුණ: ප්‍රශ්න පත්‍ර ප්‍රතිව්‍යුහගත කිරීම සහ සහන ලකුණු පිළිබඳ මෙම ප්‍රකාශ ව්‍යාජ බවත්, එවැනි කිසිදු තීරණයක් ප්‍රකාශයට පත් කර නොමැති බවත් පවසමින් අධ්‍යාපන අමාත්‍යාංශය නිල ප්‍රකාශයක් නිකුත් කර තිබේ.
අධ්‍යාපන අමාත්‍යාංශය යටතේ ඇති විභාග දෙපාර්තමේන්තුව විසින් පවත්වනු ලබන අධ්‍යාපන පොදු සහතික පත්‍ර (අ.පො.ස.) සාමාන්‍ය පෙළ විභාගය (G.C.E. O/L), සිසුන් තම ද්විතීයික අධ්‍යාපනය සම්පූර්ණ කිරීම සඳහා පෙනී සිටින ප්‍රධාන පොදු විභාගයකි. 2024-25 G.C.E. O/L විභාගය 2025 මාර්තු 17 වන දින ආරම්භ වී දිවයින පුරා පැවැත්වේ.
මාර්තු 21 වන සිකුරාදා පැවති විද්‍යා විෂය විභාග ප්‍රශ්න පත්‍රය සම්බන්ධයෙන් මෑතකදී WhatsApp සහ Facebook ඇතුළු සමාජ මාධ්‍ය වේදිකාවල පුවතක් කතාබහට ලක්වී තිබේ.
අධ්‍යාපන අමාත්‍යාංශයේ සහ විභාග දෙපාර්තමේන්තුවේ නිවේදනයක් ලෙස පෙනෙන මෙම සටහනේ සඳහන් වූයේ, මෙම වසරේ අ.පො.ස. සාමාන්‍ය පෙළ විද්‍යා විභාග ප්‍රශ්න පත්‍රයේ ව්‍යුහය අනුමත විෂය මාලාවෙන් වෙනස් කර ඇති බවයි.
මෙම අසාධාරණ ප්‍රතිව්‍යුහගතකරණය නිවැරදි කිරීමට, විභාගයට පෙනී සිටි සියලුම අපේක්ෂකයින්ට අමතර ලකුණු 8ක් ලබා දෙන බව ද, ශ්‍රේණියේ සීමාවන් ලකුණු දහයකින් (10) අඩු කරන බව ද එහි සඳහන් විය. සටහනට අනුව,
S සාමාර්ථයක් සඳහා ලකුණු 25ක්,
C සාමාර්ථයක් සඳහා ලකුණු 40ක්,
A සාමාර්ථයක් සඳහා ලකුණු 55ක්, සහ
ලකුණු 65ට වැඩි ඕනෑම සිසුවෙකුට විශිෂ්ටත්වයක් ප්‍රදානය කෙරේ.
අධ්‍යාපන අමාත්‍යාංශයේ නිවේදනයක් ලෙස පෙනෙන පරිදි නිර්මාණය කර ඇති මෙම සටහන, WhatsApp සහ Facebook හි අධ්‍යයන කණ්ඩායම්/Group තුළ පුළුල් ලෙස පැතිරෙමින් පවතී. එය සිසුන් සහ දෙමාපියන් අතර ව්‍යාකූලත්වයක් සහ කනස්සල්ලක් ඇති කර තිබේ. පළ කිරීම් මෙතැනින්, මෙතැනින් සහ මෙතැනින් දැකිය හැකිය.
අපි මුලින්ම ප්‍රධාන ධාරාවේ මාධ්‍ය නාලිකා පරීක්ෂා කළ අතර, ප්‍රධාන මාධ්‍ය ආයතනවල වාර්තාවලින් සමාජ මාධ්‍යවල සංසරණය වන පුවත් අසත්‍ය බව පෙන්නුම් කරයි.
ඊළඟට, මෙම තොරතුරුවල සත්‍යතාව තහවුරු කිරීම සඳහා අපි අධ්‍යාපන අමාත්‍යාංශයේ නිල වෙබ් අඩවිය පරීක්ෂා කළ අතර, එහි සමාජ මාධ්‍යවල පැතිර යන අසත්‍ය පුවත්වලින් මහජනතාවට ප්‍රවේශම් වන ලෙස අධ්‍යාපන අමාත්‍යාංශය ඉල්ලා සිටියි.
“අධ්‍යාපන අමාත්‍යාංශයේ සහ විභාග දෙපාර්තමේන්තුවේ නම අවභාවිතා කරමින් ව්‍යාජ ලෙස සැකසූ නිවේදනයක් මේ වනවිට සමාජ මාධ්‍ය තුළ සංසරණය වේ…ඉහත ප්‍රකාශය ව්‍යාජ ලෙස සකසා සමාජ මාධ්‍ය තුළ පමණක් සංසරණය වීමට සලස්වා ඇති බවත් එවැනි කිසිදු තීන්දුවක් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය හෝ ශ්‍රී ලංකා විභාග දෙපාර්තමේන්තුව විසින් ගෙන නොමැති බවත් මහජනතාව වෙත දැනුම් දෙමු.
“එමෙන් ම අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය හෝ විභාග දෙපාර්තමේන්තුව විසින් ප්‍රවෘත්ති නිවේදන නිකුත් කිරීම සිදු කරනු ලබන්නේ නීත්‍යනුකූල ව ලියාපදිංචි ජනමාධ්‍ය ආයතන සහ අන්තර්ජාල වෙබ් අඩවි සඳහා පමණි. ඒ සෑම නිවේදනයක් ම අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ ලිපි ශීර්ශය සහිත ව හෝ ශ්‍රී ලංකා විභාග දෙපාර්තමේන්තුවේ ලිපි ශීර්ශය සහිත ව අදාළ බලධාරියාගේ අත්සන ද සහිත ව අධ්‍යාපන අමාත්‍යාංශයීය මාධ්‍ය ඒකකය විසින් මාධ්‍ය වෙත නිවැරැදි සුපරීක්ෂණයකින් පසුව සිදු කෙරේ. එමනිසා එවන් ව්‍යාජ පුවත්වලට නොරැවටෙන ලෙස මහජනතාවගෙන් කාරුණික ව ඉල්ලා සිටිමු.”
අධ්‍යාපන අමාත්‍යාංශය ඔවුන්ගේ නිල Facebook පිටුවේ ද මෙය පළ කර ඇත.
2024-2025 අ.පො.ස. සාමාන්‍ය පෙළ (G.C.E. O/L) විද්‍යා විභාග ප්‍රශ්න පත්‍රය leak වී ප්‍රතිව්‍යුහගත කර ඇති බවත්, සියලුම අපේක්ෂකයින්ට සහන ලකුණු ලබා දෙන බවත් පවසන සමාජ මාධ්‍ය වාර්තාව අසත්‍යයකි. අධ්‍යාපන අමාත්‍යාංශය මෙම ප්‍රකාශ ව්‍යාජ බවත්, එවැනි තීරණ ගෙන නොමැති බවත් නිල නිවේදනයක් නිකුත් කරමින් ප්‍රකාශ කර ඇත. සමාජ මාධ්‍යවල සංසරණය වන වැරදි තොරතුරු පිළිබඳව ප්‍රවේශම් වන ලෙසත්, නිල නොවන මූලාශ්‍ර මගින් නොමඟ යැවීමෙන් වළකින ලෙසත් අමාත්‍යාංශය මහජනතාවගෙන් ඉල්ලා සිටී.
අපගේ මූලාශ්‍ර
අධ්‍යාපන අමාත්‍යාංශයෙන් නිල ප්‍රකාශය
වාර්තාවක් සත්‍ය බව පරීක්ෂා කිරීමට, අදහසක් ලබා දීමට, හෝ පැමිණිල්ලක් කිරීමට කැමති නම්, [email protected] හරහා අපට ඊමේල් කරන්න. අපට ලියන්න පිටුවට ගොස් පෝරමය පුරවන්න. තවත් යාවත්කාලීන වීම සඳහා අපගේ WhatsApp නාලිකාවට සම්බන්ධ වෙන්න.
False
